Bala Kanda – Sarga 69 (Valmiki Ramayana)

Dasharatha arrives at Mithila

Valmiki Ramayana – Kanda 1 – Sarga 69

ततो रात्र्यां व्यतीतायां सोपाध्यायः सबान्धवः |
राजा दशरथो हृष्टः सुमंत्रमिदमब्रवीत् || १-६९-१

अद्य सर्वे धनाध्यक्षा धनमादाय पुष्कलम् |
व्रजंत्वग्रे सुविहिता नानारत्नसमन्विताः || १-६९-२

चतुरंगबलं चापि शीघ्रं निर्यातु सर्वशः |
ममाज्ञा समकालं च यानं युग्ममनुत्तमम् || १-६९-३

वसिष्ठो वामदेवश्च जाबालिरथ काश्यपः |
मार्कण्डेयश्च दीर्घायुर्ऋषिः कात्यायनस्तथा || १-६९-४
एते द्विजाः प्रयान्त्वग्रे स्यंदनं योजयस्व मे |
यथा कालात्ययो न स्याद्दूता हि त्वरयन्ति माम् || १-६९-५

वचनाच्च नरेन्द्रस्य सेना च चतुरंगिणी |
राजानमृषिभिः सार्धं व्रजंतं पृष्ठतोऽन्वगात् || १-६९-६

गत्वा चतुरहं मार्गं विदेहानभ्युपेयिवान् |
राजा तु जनकः श्रीमान् श्रुत्वा पूजामकल्पयत् || १-६९-७

ततो राजानमासाद्य वृद्धं दशरथं नृपम् |
जनको मुदितो राजा हर्षं च परमं ययौ || १-६९-८

उवाच वचनं श्रेष्ठो नरश्रेष्ठं मुदान्वितम् |
स्वागतं ते नरश्रेष्ठः दिष्ट्या प्राप्तोऽसि राघव || १-६९-९
पुत्रयोरुभयोः प्रीतिं लप्स्यसे वीर्यनिर्जिताम् |

दिष्ट्या प्राप्तो महातेजा वसिष्ठो भगवानृषिः || १-६९-१०
सह सर्वैर्द्विजश्रेष्ठैर्देवैरिव शतक्रतुः |

दिष्ट्या मे निर्जिता विघ्ना दिष्ट्या मे पूजितं कुलम् || १-६९-११
राघवैः सह संबंधाद्वीर्यश्रेष्ठैर्महात्मभिः |

श्वः प्रभाते नरेन्द्र त्वम् सम्वर्तयितुमर्हसि || १-६९-१२
यज्ञस्यान्ते नरश्रेष्ठ विवाहमृषिसत्तमैः |

तस्य तद्वचनं श्रुत्वा ऋषिमध्ये नराधिपः || १-६९-१३
वाक्यं वाक्यविदां श्रेष्ठः प्रत्युवाच महीपतिम् |

प्रतिग्रहो दातृवशः श्रुतमेतन्मया पुरा || १-६९-१४
यथा वक्ष्यसि धर्मज्ञ तत् करिष्यामहे वयम् |

तद्धर्मिष्ठं यशस्यं च वचनं सत्यवादिनः || १-६९-१५
श्रुत्वा विदेहाधिपतिः परं विस्मयमागतः |

ततः सर्वे मुनिगणाः परस्परसमागमे || १-६९-१६
हर्षेण महता युक्तास्तां निशामवसन् सुखम् |

अथ रामो महातेजा लक्ष्मणेन समं ययौ || १-६९-१७
विश्वामित्रं पुरस्कृत्य पितुः पादावुपस्पृशन् |

राजा च राघवौ पुत्रौ निशाम्य परिहर्षितः || १-६९-१८
उवास परमप्रीतो जनकेन सुपूजितः |

जनकोऽपि महातेजाः क्रियां धर्मेण तत्त्ववित् |
यज्ञस्य च सुताभ्यां च कृत्वा रात्रिमुवास ह || १-६९-१९

इति वाल्मीकिरामायणे आदिकाव्ये बालकाण्डे एकोनसप्ततितमः सर्गः