Ikshvaaku’s lineage detailed
Valmiki Ramayana – Kanda 1 – Sarga 70
ततः प्रभाते जनकः कृतकर्मा महर्षिभिः |
उवाच वाक्यं वाक्यज्ञः शतानंदं पुरोहितम् || १-७०-१
भ्राता मम महातेजा यवीयानतिधार्मिकः |
कुशध्वज इति ख्यातः पुरीमध्यवसच्छुभाम् || १-७०-२
वार्या फलकपर्यन्तां पिबन्निक्षुमतीं नदीम् |
सांकाश्यां पुण्यसंकाशां विमानमिव पुष्पकम् || १-७०-३
तमहं द्रष्टुमिच्छामि यज्ञगोप्ता स मे मतः |
प्रीतिं सोऽपि महातेजा इमां भोक्ता मया सह || १-७०-४
एवमुक्ते तु वचने शतानंदस्य संनिधौ |
आगताः केचिदव्यग्रा जनकस्तान् समादिशत् || १-७०-५
शासनात्तु नरेन्द्रस्य प्रययुः शीघ्रवाजिभिः |
समानेतुं नरव्याघ्रं विष्णुमिन्द्राज्ञया यथा || १-७०-६
सांकाश्यां ते समागम्य ददृशुश्च कुशध्वजम् |
न्यवेदयन् यथावृत्तं जनकस्य च चिन्तितम् || १-७०-७
तद्वृत्तं नृपतिः श्रुत्वा दूतश्रेष्ठैर्महाजवैः |
आज्ञया तु नरेन्द्रस्य आजगाम कुशध्वजः || १-७०-८
स ददर्श महात्मानं जनकं धर्मवत्सलम् |
सोऽभिवाद्य शतानंदं जनकं चातिधार्मिकम् || १-७०-९
राजार्हं परमं दिव्यमासनं चाध्यरोहत |
उपविष्टावुभौ तौ तु भ्रातरावमितौजसौ || १-७०-१०
प्रेषयामासतुर्वीरौ मन्त्रिश्रेष्ठं सुदामनम् |
गच्छ मंत्रिपते शीघ्रमैक्ष्वाकममितप्रभम् || १-७०-११
आत्मजैः सह दुर्धर्षमानयस्व समंत्रिणम् |
औपकार्यां स गत्वा तु रघूणां कुलवर्धनम् || १-७०-१२
ददर्श शिरसा चैनमभिवाद्येदमब्रवीत् |
अयोध्याधिपते वीर वैदेहो मिथिलाधिपः || १-७०-१३
स त्वां द्रष्टुं व्यवसितः सोपाध्यायपुरोहितम् |
मंत्रिश्रेष्ठवचः श्रुत्वा राजा सर्षिगणस्तदा || १-७०-१४
सबन्धुरगमत्तत्र जनको यत्र वर्तते |
राजा च मंत्रिसहितः सोपाध्यायः सबांधवः || १-७०-१५
वाक्यं वाक्यविदां श्रेष्ठो वैदेहमिदमब्रवीत् |
विदितं ते महाराज इक्ष्वाकुकुलदैवतम् || १-७०-१६
वक्ता सर्वेषु कृत्येषु वसिष्ठो भगवानृषिः |
विश्वामित्राभ्यनुज्ञातः सह सर्वैर्महर्षिभिः || १-७०-१७
एष वक्ष्यति धर्मात्मा वसिष्ठो मे यथाक्रमम् |
तूष्णींभूते दशरथे वसिष्ठो भगवानृषिः || १-७०-१८
उवाच वाक्यं वाक्यज्ञो वैदेहं सपुरोधसाम् |
अव्यक्तप्रभवो ब्रह्मा शाश्वतो नित्य अव्ययः || १-७०-१९
तस्मान्मरीचिः संजज्ञे मरीचेः कश्यपः सुतः |
विवस्वान् कश्यपाज्जज्ञे मनुर्वैवस्वतः स्मृतः || १-७०-२०
मनुः प्रजापतिः पूर्वमिक्ष्वाकुश्च मनोः सुतः |
तमिक्ष्वाकुमयोध्यायां राजानं विद्धि पूर्वकम् || १-७०-२१
इक्ष्वाकोस्तु सुतः श्रीमान् कुक्षिरित्येव विश्रुतः |
कुक्षेरथात्मजः श्रीमान् विकुक्षिरुपपद्यत || १-७०-२२
विकुक्षेस्तु महातेजा बाणः पुत्रः प्रतापवान् |
बाणस्य तु महातेजा अनरण्यः प्रतापवान् || १-७०-२३
अनरण्यात्पृथुर्जज्ञे त्रिशंकुस्तु पृथोः सुतः |
त्रिशंकोरभवत्पुत्रो धुन्धुमारो महायशाः || १-७०-२४
धुन्धुमारान्महातेजा युवनाश्वो महारथः |
युवनाश्वसुतस्त्वासीन्मान्धाता पृथिवीपतिः || १-७०-२५
मान्धातुस्तु सुतः श्रीमान् सुसन्धिरुदपद्यत |
सुसंधेरपि पुत्रौ द्वौ ध्रुवसंधिः प्रसेनजित् || १-७०-२६
यशस्वी ध्रुवसंधेस्तु भरतो नाम नामतः |
भरतात्तु महातेजा असितो नाम जायत || १-७०-२७
यस्यैते प्रतिराजान उदपद्यन्त शात्रवः |
हैहयास्तालजंघाश्च शूराश्च शशबिंदवः || १-७०-२८
तांस्तु स प्रतियुद्ध्यन् वै युद्धे राजा प्रवासितः |
हिमवन्तमुपागम्य भार्याभ्यां सहितस्तदा || १-७०-२९
असितोऽल्पबलो राजा कालधर्ममुपेयिवान् |
द्वे चास्य भार्ये गर्भिण्यौ बभूवतुरिति श्रुतम् || १-७०-३०
एका गर्भविनाशार्थं सपत्न्यै सगरं ददौ |
ततः शैलवरे रम्ये बभूवाभिरतो मुनिः || १-७०-३१
भार्गवश्च्यवनो नाम हिमवंतमुपाश्रितः |
तत्र चैका महाभागा भार्गवं देववर्चसम् || १-७०-३२
ववन्दे पद्मपत्राक्षी कांक्षन्ती सुतमुत्तमम् |
तमृषिं साभ्युपागम्य कालिन्दी चाभ्यवादयत् || १-७०-३३
स तामभ्यवदद्विप्रः पुत्रेप्सुं पुत्रजन्मनि |
तव कुक्षौ महाभागे सुपुत्रः सुमहाबलः || १-७०-३४
महावीर्यो महातेजा अचिरात् संजनिष्यति |
गरेण सहितः श्रीमान् मा शुचः कमलेक्षणे || १-७०-३५
च्यवनं च नमस्कृत्य राजपुत्री पतिव्रता |
पत्या विरहिता तस्मात् पुत्रं देवी व्यजायत || १-७०-३६
सपत्न्या तु गरस्तस्यै दत्तो गर्भजिघांसया |
सह तेन गरेणैव संजातः सगरोऽभवत् || १-७०-३७
सगरस्यासमंजस्तु असमंजादथांशुमान् |
दिलीपोंऽशुमतः पुत्रो दिलीपस्य भगीरथः || १-७०-३८
भगीरथात्ककुत्स्थश्च ककुत्स्थस्य रघुस्तथा |
रघोस्तु पुत्रस्तेजस्वी प्रवृद्धः पुरुषादकः || १-७०-३९
कल्माषपादो ह्यभवत्तस्माज्जातस्तु शङ्खणः |
सुदर्शनः शंखणस्य अग्निवर्णः सुदर्शनात् || १-७०-४०
शीघ्रगस्त्वग्निवर्णस्य शीघ्रगस्य मरुः सुतः |
मरोः प्रशुश्रुकस्त्वासीदंबरीषः प्रशुश्रुकात् || १-७०-४१
अंबरीषस्य पुत्रोऽभून्नहुषश्च महीपतिः |
नहुषस्य ययातिस्तु नाभागस्तु ययातिजः || १-७०-४२
नाभागस्य बभूवाजः अजाद्दशरथोऽभवत् |
अस्माद्दशरथाज्जातौ भ्रातरौ रामलक्ष्मणौ || १-७०-४३
आदिवंशविशुद्धानां राज्ञां परमधर्मिणाम् |
इक्ष्वाकुकुलजातानां वीराणां सत्यवादिनाम् || १-७०-४४
रामलक्ष्मणयोरर्थे त्वत्सुते वरये नृप |
सदृशाभ्यां नरश्रेष्ठ सदृशे दातुमर्हसि || १-७०-४५
इति वाल्मीकिरामायणे आदिकाव्ये बालकाण्डे सप्ततितमः सर्गः
