Bala Kanda – Sarga 61 (Valmiki Ramayana)

Lend of shunashshepa

Valmiki Ramayana – Kanda 1 – Sarga 61

विश्वामित्रो महातेजाः प्रस्थितान् वीक्ष्य तानृषीन् |
अब्रवीन्नरशार्दूल सर्वांस्तान् वनवासिनः || १-६१-१

महान् विघ्नः प्रवृत्तोऽयं दक्षिणामास्थितो दिशम् |
दिशमन्यां प्रपत्स्यामस्तत्र तप्स्यामहे तपः || १-६१-२

पश्चिमायां विशालायां पुष्करेषु महात्मनः |
सुखं तपश्चरिष्यामः परं तद्धि तपोवनम् || १-६१-३

एवमुक्त्वा महातेजाः पुष्करेषु महामुनिः |
तप उग्रं दुराधर्षं तेपे मूलफलाशनः || १-६१-४

एतस्मिन्नेव काले तु अयोध्याधिपतिर्महान् |
अंबरीष इति ख्यातो यष्टुं समुपचक्रमे || १-६१-५

तस्य वै यजमानस्य पशुमिन्द्रो जहार ह |
प्रणष्टे तु पशौ विप्रो राजानमिदमब्रवीत् || १-६१-६

पशुरभ्याहृतो राजन् प्रणष्टस्तव दुर्नयात् |
अरक्षितारं राजानं घ्नन्ति दोषा नरेश्वर || १-६१-७

प्रायश्चित्तं महद्ध्येतन्नरं वा पुरुषर्षभ |
आनयस्व पशुं शीघ्रं यावत् कर्म प्रवर्तते || १-६१-८

उपाध्यायवचः श्रुत्वा स राजा पुरुषर्षभ |
अन्वियेष महाबुद्धिः पशुं गोभिः सहस्रशः || १-६१-९

देशान् जनपदांस्तांस्तान्नगराणि वनानि च |
आश्रमाणि च पुण्यानि मार्गमाणो महीपतिः || १-६१-१०
स पुत्रसहितं तात सभार्यं रघुनंदन |
भृगुतुंगे समासीनमृचीकं संददर्श ह || १-६१-११

तमुवाच महातेजाः प्रणम्याभिप्रसाद्य च |
महर्षिं तपसा दीप्तं राजर्षिरमितप्रभः || १-६१-१२
पृष्ट्वा सर्वत्र कुशलमृचीकं तमिदं वचः |

गवां शतसहस्रेण विक्रीणीषे सुतं यदि || १-६१-१३
पशोरर्थे महाभाग कृतकृत्योऽस्मि भार्गव |

सर्वे परिगता देशा यज्ञियं न लभे पशुम् || १-६१-१४
दातुमर्हसि मूल्येन सुतमेकमितो मम |

एवमुक्तो महातेजा ऋचीकस्त्वब्रवीद्वचः || १-६१-१५
नाहं ज्येष्ठं नरश्रेष्ठ विक्रीणीयां कथंचन |

ऋचीकस्य वचः श्रुत्वा तेषां माता महात्मनाम् || १-६१-१६
उवाच नरशार्दूलमंबरीषमिदं वचः |

अविक्रेयं सुतं ज्येष्ठं भगवानाह भार्गवः || १-६१-१७
ममापि दयितं विद्धि कनिष्ठं शुनकं प्रभो |
तस्मात् कनीयसं पुत्रं न दास्ये तव पार्थिव || १-६१-१८

प्रायेण हि नरश्रेष्ठ ज्येष्ठाः पितृषु वल्लभाः |
मातॄणां च कनीयांसस्तस्माद्रक्षे कनीयसम् || १-६१-१९

उक्तवाक्ये मुनौ तस्मिन् मुनिपत्न्यां तथैव च |
शुनःशेपः स्वयं राम मध्यमो वाक्यमब्रवीत् || १-६१-२०

पिता ज्येष्ठमविक्रेयं माता चाह कनीयसम् |
विक्रेतं मध्यमं मन्ये राजपुत्र नयस्व माम् || १-६१-२१

अथ राजा महाबाहो वाक्यान्ते ब्रह्मवादिनः |
हिरण्यस्य सुवर्णस्य कोटिभी रत्नराशिभिः || १-६१-२२
गवां शतसहस्रेण शुनःशेपं नरेश्वरः |
गृहीत्वा परमप्रीतो जगाम रघुनंदन || १-६१-२३

अंबरीषस्तु राजर्षी रथमारोप्य सत्वरः |
शुनःशेपं महातेजा जगामाशु महायशाः || १-६१-२४

इति वाल्मीकिरामायणे आदिकाव्ये बालकाण्डे एकषष्टितमः सर्गः

हिंदू धर्म, जिसे सनातन धर्म भी कहा जाता है, विश्व के सबसे प्राचीन धर्मों में से एक है। यह केवल एक धर्म नहीं, बल्कि एक जीवन पद्धति है, जो वेदों, उपनिषदों, पुराणों, भगवद गीता, रामायण और महाभारत जैसे ग्रंथों पर आधारित है। इसका मूल उद्देश्य आत्मा की शुद्धि, मोक्ष की प्राप्ति और धर्म, अर्थ, काम, मोक्ष — इन चार पुरुषार्थों की प्राप्ति है।